كيف تحدد سعرك ...

ازاى تحدد سعرك فى السوق ؟ 

باختصار .. سعرك يعني مرتبك .. قيمتك .. حجمك .. لو سعرك قل .. قمتك تقل .. بالتالي مرتبك يقل .. و علشان كده لازم تكون عارف ازاي تحدد سعرك بظبط في سوق العمل ... و هي دي المشكلة اللي اغلب الناس بتقع فيها لما يتسألوا اكتر سؤال مرعب في الانترفيو او مقابلة العمل و هو سؤال : تحب مرتبك يبقى كام ؟

و جاوبت بمرتب عالي ممكن توصل فكرة انك مدي نفسك قيمة اعلى من قيمتك الحقيقية ده غير طبعا ان ممكن يكون فيه متقدمين لنفس الشغلانة بس طلبوا مرتب اقل .. و ده يخليك تبعد عن قايمة المرشحين للوظيفة و تروح عليك
او تطلب مرتب صغير و ساعتها توصل فكرة انك بتقلل من شغلك و بتقلل من مهاراتك فالبتالي صاحب الشغل يخاف يوظفك و تروح برضو عليك الوظيفة

و علشان متقعش في فخ السؤال ده و تحدد سعرك صح سواء لمرتب الوظيفة او سعر خدمة بتقدمها عن طريق العمل الحر او الفريلانسج .. لازم تطبق الطرق دي

دور اونلاين
في مواقع كتير موجودة اونلاين تقدر تحدد من خلالها مرتبك مفروض يكون كام .. حيث ان المواقع دي بيكون فيها كل الوظايف اللي ممكن تتخيلها و محدد لكل وظيفة السعر المفترض للمرتب مهما كان درجتك في الوظيفة .. و دول بعض المواقع اللي بتقدملك الخدمة دي ببلاش

Salary.com
Payscale.com
glassdoor.com

حدد حجم خبرتك
بعد معرفة متوسط المرتبات من المواقع المذكورة فوق دي .. جه دورك دلوقتي في انك تحدد اذ كنت هتزود الرقم اللي انت طلعته ده ولا هتنقصه .. و اجابة السؤال ده بتعتمد من الاساس على حجم خبرتك .. و مقياس مهاراتك المختلفة .. لو انت حجم خبرتك قليل لازم تقلل من المرتب لحد اللي يناسب قدراتك .. و طبعا كل ما تزيد خبرتك كل ما المرتب مفروض يزيد بنسبة معينة

خليك مرن
لو انت واحد بتدور على شغل جديد .. متحاولش تتمسك بمرتب معين .. العناد في سعر معين ممكن يخلي صاحب الشغل يتغاضي عن انه يوظفك بغض النظر عن اي مميزات فيك .. و الحل هنا انك ممكن تتفق صاحب الشغل على مرتب معين في مقابل انك هتديلوا مهام شغل زيادة عن مهامك الرئيسية .. و ده طبعا بيديك افضلية عن المتقدمين للوظيفة بنسبة كبيرة جدا

اعرف حجم الشركة كويس
من اهم الحاجات اللي تحدد بيها مرتبك هو قدرة الشركة دي اصلا على دفعك مرتبك ده ولا لأ .. انت ممكن بعد حساب خبرتك و مهاراتك و معرفة متوسط مرتبك المفترض .. تلاقي ان المرتب ده يعتبر رقم عالي جدا بالنسبة للشركة اللي انت بتقدم فيها .. و ان لو حتى انت فيك مميزات و قدرات تخليك المرشح الاول للوظيفة .. هتخلي الشركة ترفضك لمجرد عدم قدرتها على دفع مرتبك شهريا .. فخلي بالك من النقطة دي كويس

اسأل ذوي الخبرة في المجال
من افضل و انجح الطرق في تحديد سعر قيمة المرتب هي سؤال اصحاب الخبرة في المجال المراد العمل فيه .. حيث انهم بيبقى ليهم دراية بمتوسط المرتبات الفعلية في السوق .. و بسؤالك ليهم عن قيمة مرتبك المفترضة هما هيكونوا اكتر ناس تفيدك في الموضوع ده

سر الموضوع ده كله في حاجة واحدة و هي "اللي يسأل ميتوهش".. دور دايما و اعرف اكتر .. جمع قاعدة بيانات بمتوسط الاسعار .. اسأل الخبراء .. جرب الشركة دي و الشركة دي .. اسأل موظفين الشركة نفسها .. كل الحاجات دي لو طبقتها صح .. و جه اليوم اللي تتسأل فيه " تحب مرتبك يبقى كام ؟ " .. هتكون بتجاوب و انت متأكد 100% ان المرتب اللي بتطلبه فعلا يعبر عن قيمتك الحقيقة في السوق